Saga T.R.

Ritað í tilefni 100 ára afmæli félagsins 6. október 2000

Taflfélag Reykjavíkur var stofnað 6. október árið 1900 og heldur félagið því upp á 100 ára afmæli sitt á árinu 2000. 

Einn af stofnendum félagsins, Pétur Zóphóníasson, segir í grein sinni í afmælisriti T.R. 1950 að á stofnfundi félagsins hafi mætt 29 menn, sem gengu í Taflfélag Reykjavíkur og síðan var kosin stjórn félagsins sem auk hans skipuðu, Sigurður Jónsson, formaður og Pétur Pétursson, bæjargjaldkeri. Margir merkir menn gengu í félagið og léðu því stuðning s.s. Ólafur Thors ráðherra og Daniel Willard Fiske, sem gaf félaginu sín fyrstu Staunton-skáksett.


Helstu markmið hins nýja félags voru að eignast skáksett, efna til skákmóta og standa fyrir skákkennslu. Þó nú séu nær 100 ár síðan félagið var stofnað og félagsmenn orðnir á sjötta hundrað er ljóst að markmið hins gamla félags standa enn fyrir sínu. 

Helstu markmið Taflfélags Reykjavíkur í dag eru að standa fyrir skákmótum fyrir unga sem aldna. Auk þess er lögð rík áhersla á að efla skákiðkun meðal barna og unglinga og gefa skákmönnum tækifæri á að tefla á erlendri grundu og fá hingað til lands öfluga erlenda skákmeistara. Til að uppfylla þessi markmið hefur félagið staðið fyrir fjölda skólaskákmóta, haldið alþjóðleg skákmót og stutt félagsmenn sína til þátttöku á skákmótum erlendis.